Wednesday 3 April 2013

CHET CHHIAT NA.


SIKAWW (SCHO) KA LA VE!
Class 12 ka zir kum kha a nia, mi te ang bawkin scho kha ka dil ve a, la tur list a rawn chhuak a, tlar hmasa lamah ka hming kha a lo awm ve vang mai, nuam ve mai mai tak chu ni. Lak hma hawt khan a hmanna turah ka lo buai ve em em ringawt phawt a, mahse a awm ve tho, sang chuang teh meuh kha kan la dawn miau a, tam tham ve deuh a nia, hmanna tur lam ka lo suangtuah lawk dan tlangpui chu:

1)      Thawmhnaw thar ka nei khat, thla lai hawl vel a t-shirt pakhat ka lei tih loh kha chu, a dang ka la lei leh miah lo, chuvangin t-shirt pakhat tal lei ngei ngei a ngai, inkhawm kamis pawh pakhat chauh ka nei, a ngai ringawt hak chu a zahthlak tih vang ringawtin ka inkhawm loh phah ve ziah bawk, chuvangin t-shirt leh kamis pakhat ve ve.
2)      Ka bialnu hian thil min lei sak ve ziah a, tun tum chu engemaw tal leisak ve a ngai a ni, englampang nge niang aw.. Thi, zungbun, bengbeh… aaa.. a to awm sia, lak ni ah restaurant changkang deuhah treat zawk ila a fuh ang, a ni pawh a lawm ngawt ang, a let tam takin min hmangaih zual phah hrim hrim.
3)      Keima pual pawisain a senchi hi ka la lei miah lo, chuvangin sawi ve reng rengah um khat na na na chu ka va han lei dawn chiang tak e aw… kan veng kungfu thiam ukaia kan khilai bawk anga a va nuam dawn em.
4)      Ka nau khawl bawm hi ka rawk ve ziah a, ka ha sen leh a hmai sen hi kan inhmuh zing lutuk, chuvangin tam tham ve tak dah sak ila, ha sen leh hmaisen kan inhmuh tawh miah lo vang.
5)      Thla hmasa a cigrette loose cheng sawm man ka bat kha, ka va rul dawn chiang tak em.
6)      Kan veng hmeithai zu zuar hmanah ka risk ve ringawt a, chuta tang chuan min be duh tawh miah lo, funte khat 150 velin dawr ila a zia deuh ang.
7)      Lak ni tlaiah taxi hire ila, a hnungah auto rickshaw pahnih vel inzui tir bawk ila, a nuam phian a ngem? Haha..

He ti zawng hi ni hrih phawt teh se, a va nuam dawn em, lak hma hawt hian ka khi vur vur reng mai, chhungte bulah lah ka submit dawn lo chiang nasa mai si, ‘khawnge I scho lak ve chu’ an tih leh ‘ka la ve thei lo, ka thinrim mah nak lai a..’ kan ti vei luam anga, an awih leh dawn lutuk tlat, tichuan zan khat a ral a, chhun khat a liam leh a, khua a var leh ta.. halleluiah…

School kal hi engtiklai mahin ka phur ngailo hrim hrim, mahse scho lak ni ber kher kha chu ka phur ve chiang a lawm, scho kan la dawn tho tih thuah dawrah nepnawi sawmthum man ngawt ka’n ba thla nghal pang a, ke pen a zang a, nakin lawk a ip te a sang chuang awm tur mitthla reng chungin school chu ka thleng ta, thiante chu an lo titi sap sap a, ‘engzah nge I lak dawn?’ ‘kei chu ka la tlem dawn lutuk’ ‘canteenah ba ka lo ngah lutuk a, min cut nasa ngawt ang’ etc… chutiang vel chu titi tlangpui a ni, rei lutuk lo kan nghak a, a lak theih thu an lo puang ta, tlar hmasa lamah ka intlar nghal vat a, a va nuam dawn heih heih em, ka hun a thleng ve ta le…!

Sir leh madam an lo thu a, sir chuan, ‘. 1800..’ an ti sap a, a ri a mawi a sin! ‘canteenah ba I nei nual a… school fee I ba nual bawk a, class I regu lo a, leave letter I thawn ngai vak lo bawk, vawikhat kal loh hi 20 zel fine kan tih kha, chuan study tour I kal ve dawn bawk a, kan cut vek che a ngai a nia..’ a ti sap a, an cut hnem vak ka rin loh a vangin, ‘e.. cut ru cut ru’ kha kan ti awlsam et a, chutah madam chuan a’n cut tak tak mai chuhh….!

Min en ang he haw a,’ kha I scho’ tih pahin dawhkanah cheng hnih thir leh cheng khat thir an dah ri chhak mai chuhh… a zahthlak si, a nuihzatthlak bawk si, a mualphothlak bawk si, madam lah a awrawl a ring ropui bawk nen, mi zawng zawngin an hre ta! Hnuailam an bih a, an nui ang tet tut a, chutah ka thianpa ngei mai chuan chhuat beng meuhin min han nuih ta tak tak a nih kha, thinrimna chi a ni bawk silo, ka ‘he he..’ liam ve ta mai mai, a nuih tawi theih ngei mai.

Ka duhthusam a thamral ve chiang ngawt mai, ka bialnu pawh hmu ta lo chuan ka haw ta ringawt a, ka haw tih a hriat chuan min lo text vat a,

‘cheng thum chauh pawh la mahla, ka hmangaih tho tho che! :D’

A HIT VIAU LO..

Tlaiah ka thianpa nen zu kan in a, kan rui tawh angreng, a rui phur chu a bialnu te inah len pui turin min sawm ta tlat mai, chaw ei a hun tawh hi tih pawhin, a ho lutuk a ti tlat bawk si, ka kal pui ta nge nge a, an in kan thlen chuan a lo inkhar thap a, kan rui phur chuan ‘ventillation tangin bihthla chhin ang’ kan tia, kan inkoki chhuan ta, kawngka a lo inkalh silo, ka rui pai vel khan ka pawt hawng, engtin tin emaw kan inkoki chhuan lut ta, chhung inkhawmna an lo hmang mek chu niin….! Zahthlak duh haih haih tak chu ni…